من زمااان
أعرضت عن السينما
رفضت تسليم وقتي و فلوسي
لمشاهدة قصة تعبانة
أو كوميديا خايبة
أو على أحسن الأحوال
لو فيلم اتضح انه جامد
فالبركة في الكمبيوتر
*
بين الحين و الآخر
ينتابني أمل في فيلم
يدخله أحد الأصدقاء
فأنهال عليه بالسؤال و التحريات
لكي أبلور رأي
أخش و لا لأ
*
الأفلام بالنسبة لي
يا ضحك و تهييس
و أحب هذا النوع
و لكن علاء ولي الدين مات
يا اما أفلام ذات قصة
و بت أخاف جدا من هذا النوع
لأني أحبط عندما أعول آمال على فيلم
و يطلع فسسسس
*
ولكن
فيلم أبطاله
عادل امام و عمر الشريف
بغض النظر عن العط الذي يشتهر به الأول
انما الراجل تاريخ
و الراجل التاني مثل في أفلام خرافية
بأدوار أجاد تمثيلها
مثلا: فيلم عن جنكيز خان
و كان كله انجليزي
و مثلا برضه: فيلم مسيو ابراهيم و زهور القرآن
و كان كله فرنساوي
و عادل امام مشواره لا يخفي على أي مواطن ايجيبشن
و كون ان الاتنين
يجتمعان في فيلم واحد لأول مرة
حدث برضه
*
ليس الممثلين فحسب
كلا ألبتة
خد عندك
المؤلف: يوسف معاطي
اسم تقيل
بغض النظر عن العط الذي كان يكتبه
ليعط عادل امام في الكام فيلم الأخراني
انما حد يقدر ينكر مسلسل زي عباس الأبيض
و مش بس الممثلين و المؤلف
ده حتي الراجل بتاع الموسيقي التصويرية
اللي عامل الموسيقي للفيلم كله
ياسر عبد الرحمن
يعني فارس بلا جواد مثلا
و المخرج .. رامي امام
مثلا أمير الظلام
كوميديا رغم أنف العط
ضف على هذا كله
موضوع شائك و حساس
تناوله اما أن يكون
وعظي ساذج
ملئ بـ"احنا بنحب بعض
متحيز منفر
من طراز هما كفرة أو احنا قلة و مضطهدين
أو التناول الثالث
الذي يحتاج الي توفيق كبير و مهارة
*
التذكرة
قلم السيدة الذي يشطب على مقعدنا
الفيشار الكبير أوي
اظلام
*
أخرج من الفيلم
و أنا في قمة السعادة
(و ده يرجع لأن التوقيت الشتوي يسمح بدخول السينما و اللحاق بالصلاة في ميعادها أيضا)
صبرت و نلت
*
لن أحرق الفيلم
و لكنه خطيييير
أدعو كل بني آدم
أن يزحزح نفسه من الشباك المجاور
و يقف في صف هذا الشباك
و يقطع تذكرته و يدعيلي
*
الفيلم
واو
حالة شعورية جميلة
نقد لاذع و ساخر من المنفسنيين في الديانتين
نجاح في محاولة التقريب بين الديانتين بناء على المواقف لا الوعظ
عدم التجريح في من الديانتين
ابراز للتشديد بصورة متناغمة مع الأحداث
مما يجعلك تتقزز من التشدد نفسه
لا من ظنك أنه مقصود و أنك متهم
زووم ان على الدماء المراقة نتيجة الوقيعة بين المجتمعين
أيضا بصورة متناغمة مع الأحداث .. بدون سذاجة
و صباح الحالة الروحية العالية
المسلم سينتشي بروحانيات المسيحية
و المسيحي سينتشي بروحانيات المسلم
ده وعد مني
و مفاجأة .. مفيش أي عط في الفيلم
شكرا يا أستاذ عادل على عدم لمس مؤخرة بطلتك
شكرا يا أستاذ يوسف على عدم زج التهريج الجنسي الماسخ في الفيلم
*
الفيلم جامد
بجد جامد
و مش حاحرق الفيلم
بس أكتر مشهد عجبني
هو أول مشهد ظهر فيه عادل امام و عمر الشريف مع بعض
جميييل و رقيييق أوي
*
اذهبوا الي السينما
*
اللهم اجعلنا من المسبحين
