على سور جامع عمرو
مايكات
قرآن بصوت جميل
و ناس و هلمة رايحة جاية
*
على سور جامع عمرو
واحد بيصلي على فرشته
مدخلش و متسألش ليه
و عسكري لابس اسود
بيسجر قدام مكان خدمته
و رتبة بكرش و لاسلكي
لابس ابيض نضيف
واقف طول وقت الصلا
يلمع في جزمته
*
جوه جامع عمرو
راجل وشه ملهوف
على ثواب القيام
قدامه زمزميته
و في ايده مصحف بيتابع القراية
وفي قلبه شوق كبير
و راجل تاني بيبكي
بحرقة
على عمرة فاتته
بسبب انفلونزا الخنازير
*
جوه جامع عمرو
راجل صلي أربعة
و ماشي مضطر
وراه مشاغل
و راجل هيكمل التمانية
مدايق
نفسه يكون وراه مشاغل
*
على سور جامع عمرو
راجل بينادي على سراويل
و بكل الالوان
و عمره ما لبس جلابية السنة
و شابة أمورة في اسدال
بتبيع للناس الذكر و السبح
و مستنية النصيب و الرزق
*
على سور جامع عمرو
عيال بعجل و بمب
و ستات قعدة بتعمل أبصر ايه
و رجاله سارحة بفوانيس و كور كفر
*
بره جامع عمرو
في قهوة عمرانة بالزباين
أهلها مجاورين للجامع
و عمرهم ما فوتوا شيشة العشا
و ست تخينة لابسة اسود
بقدرة قادر تسد طريقك
و باتنين جنيه فضة
تدعيلك
*
على باب جامع عمرو
راجل قاعد على الامانات
و يتفرج على المصلين
و راجل طالع بكذا فردة شبشب
و راجل داخل حافي
*
جوه جامع عمرو
واحد واقف في الهوا
يصلي
و في ركن بعيد
واحد قاعد بيقرا
و قدام خالص
واحد طلع الشخير من بقه
*
على سور جامع عمرو
وقفت حيران
انا العبد الغلبان
هي الناس مش عارفة
ولا مصهينة
*
على سور جامع عمرو
موبايل بيتعمل سايلنت
و موبايل بينقل شتائم
*
على سور جامع عمرو
واحد بسبب مائدة الرحمن
مابقاش جعان
و واحد من اعلانات التلفزيون تعبان
و واحد روحه تعبانة
و واحد جسمه عيان
و واحد في مصيبة غرقان
و واحد جي يتفرج على الحجارة
و واحد جي يقعد عشان يحس بالجلال
*
على سور جامع عمرو
ربنا سايب اللي يسرق
يسرق
و اللي يخشع
يخشع
و اللي مصدق بيوم اللقا و بيسرق
قلبه بيتعذب
و اللي بيصلي اكمن الناس بيصلوا
قلبه بيتفسح
*
جوا جامع عمرو
ناس كتير بيصلوا
و كأن الجوامع التانية
فاضية
و شباب بيملوا كولمنات الميه
و كأن الشباب كل الشباب
هادية
و رجاله قاعدة في ركن
بيستقبلوا دم المتبرعين
كأن مصر كلها
خاشية
و أول ما اخرج
عربية تزنق اختها
و لسان يعلن للسما السابعة
ان الدنيا مش سايبة
*
في جامع عمرو
انا حيران
اتفرج على ناس اشكال والوان
و لولاك يا رب
كان زماني خيبان
و لا يمكن انا خيبان
و واحد تاني بيتفرج على
و بيقول في سره
لولاك يا رب
كان زماني زيه
*
يا رب عمرو و جامع عمرو
ماليش حد غيرك
امتي بقي حتظبط
