اذا انا احب ان اكون
Best of the best of the best of the ...
*
اذا هي حقيقة
حاولت دفنها اكثر من مرة
و حاولت انفضلها كتيييير
كما حاولت ان انكرها و افسرها على انها اي حاجة تانية
و لكن عزيزي كاتب هذه السطور
انها حقيقة
مؤلمة بقه
حلوة وحشة
مزعجة مريحة
مش دي القضية
القضية انها حقيقة واقعة مقيمة
على الاقل لحد هذه الثانية
انا احب ان اكون
Best of the best of the best of the...
*
اي قارئ طيب القلب سليم الطوية نبيل الهدف
سيقول
طب و ماله يا ابني
دي حاجة كويسة
ربنا يزيدك من موضوع البست ده
اقوم انا خابط ايدي على -عفوا- أورتي
و احزن على هذه الدعوة
ثم انزع يدي من -عفوا تاني- أورتي
و أدرك طيبة قلب من أمامي
فأفرمل و أتراجع عن زجره و نهره
ثم أشرح بصوت يتمسك بالهدوء
و يستعين بقدر المستطاع بأشلاء ترابية اسمها الذاكرة
و بتحفز مختلط بحب المنطق
اقول
شوف يا نجم الليالي و الزمن
المشكل ليس يقع على المبدأ
المبدأ عال عال وفوق الراس وكل حاجة
ولكن ما يمليه عليك هذا المبدأ هو النصيبة بعيد عن سيادتك
(استغرق في التفكير .. بدور على مثال يوضح)
آآه .. مثلا
لو انت عينك مركزة في غصن شجرة
واخدلي بالك .. غصن شجرة
حتلاقي ان الغصن مش طالع من جذع الشجرة مستقيم
كلا ألبتة .. ده طالع كده أوله ماشي يمين
و بعد كده حدف شمال فجأة
و في الآخر اتجه لفوق
عادي بقه .. غصن شجرة
اللي مش عادي بقه ان عينين سيادتك مش شايفة الغصن
مش شايفة غصن خارج من جذع و الغصن في حد ذاتيته خارج منه اغصان صغننة
مش شايفة شوية الورق الاخضر اللي قابة من كل الاغصان الكبيرة و الصغننة
العين يا سيدي بتاعة البني آدم ذو البست اوف ذا بست
لا تري الا حتة خشبة لا راحت و لا جت
حتة خشبة ماشية ملوية
و صاحب العين دي يا سيدي حياته كلها
بالمعني اللفظي و المجازي
حياته كلها مكرسة لهدف واحد وحيد ياتم يتيم
هو ازاي ان الغصن الحقير ده يمشي في خط مستقيم
مستقييييييييييييييم
ولا توت يمين و لا توت شمال
مستقيييييييييييييييييم
هوا يحركه ما يحركوش
عوامل خارجية عوامل الجن الازرق
مستقيييييييييييييييييم
حلاوة الورق الاخضر .. جمال الشجرة .. طظ
المهم يمشي مستقييييييييييييييييم
فهل انت راضي يا سيد ياللي دعتلي من شوية ان ربنا يزيدني عن نفسك؟
طب خد دي
:
لما البش مهندس بتاع البست
يكافح نفسه و يكرس وقته و يدلق مجهوده و يستنزف ذاته
عشان يعدل الغصن ابن الذين اللي عاملو كالو في دماغه
و يحرز اي تقدم ولو توت في المية
و يقوم باصص بقه على بقيت الشجرة
فانه عندئذ سيدي الفاضل يتلقي اعظم طعنة في تاريخه و تاريخ اللي جابوه
اذا انه يدرك و يبصر و يكتشف ان
الجذع ملتوي
و بقيت اغصان ام الشجرة كلها ملتوية
وا حسرتاه
هنا .. تتقفل الدنيا في وشه
و تسود الحياة في عينه
و يبكي بحرقة ولو بداخله
و يندم على اليوم اللي نزل فيه في الدنيا
و يقول في عقل باله
يعني انا يا ربي بعد كل ده و الغصن اللي في ايدي لسه متظبطش
و كل دول لسه ملويين
اذا عمرها ما ح تنعدل
عمرها ما حتنعدل
و يجد اليأس الارض مفروشاله رمل
فيخش بمنتهي السهولة و اليسر ضيف عزيز
و يقعد يحطم و يكسر و يهشم و يدغدغ
لحد ما الغلبان بتاع بست يفقد الرغبة في هذا الغصن و هذه الشجرة وفي الدنيا كلها
اذا انه يتيقن انه لا أمل في ان اي حاجة تبقي معدولة
و هنا يلجأ للهروب و الانسحاب حزنا و قهرا
و كلما فكر في العودة
تمثلت لعينيه مجهوده الخرافي
الذي لم يكفي غصن صغير
ثم تتمثل امامه الشجرة الملتوية كاملة
التي لم و لن يستطيع ان يعدل منها فتفوتة مهما أمد الله في عمره أو وهب من قدرة
فاذا به يزداد ضيقا و هروبا و يأسا وقرف ونيلة
فهلا سحبت دعوتك بعد اذنك؟
*
البرنس المبتلي بقصة البست
بالرغم من كل الكلام الغم السابق
هو عبارة عن موجة كبيرة عالية
من بتاعة الأفلام الأجنبي اللي فيها تزحلق على الماء
موجة هائلة عاتية
تلتهم ما أمامها غير عابئة
لا يوقفها شئ الا ارادة الرب
موجة قادرة على صنع الكوارث
تسونامي كمثال
او رسم آية مبهرة الجمال
موجة اذا أحسن توجيهها
اكتسحت الحمق و دفعت الي الأمااااام
موجة زرقاء كالجبل
و سرعة تخشاها الرياح
و قوة تغير منها النار
و قدرة تدهش اليشر قاطبة
و تكوين تتمناه الفراشات و الأزهار
موجة من ماء
*
المشكلة ان هذه الموجة الممدوحة سالفا
اذا لم تتجه للسليم القويم الجميل
هي هي الموجة
سوف تندفع بسرعتها و قوتها و قدرتها و تكوينها
الي كل ما يوصف
بـ ولا مؤاخذة
الخراء
*
على من يدرك انه مبتلي بموضوع البست
ان يعي جيدا جدا
ان اللي قال مثل
الرياح تأتي بما لا تشتهي السفن
لم يكن حشاشا
كلا ألبتة
بل كان أغلب الظن واحد بستاوي
ضيع عمره في بنا السفن
اللي مثلا بتمشي مع الرياح في طريق الجنوب
مثلا يعني
و فني عمره في بنا السفن
و تزويقها و اتقانها و تظبيطها
و مثلا استمر الموضوع ميت سنة
و كل ده مثلا برضه
و الرياح عمالة تيجي شمالا و غربا و شرقا
و هو قاعد يا عين امه نفسه في نسمة هوا تيجي من الجنوب
بس يا حسرة قلبي ماكنش في
ده يعني مثلا
المهم .. على من يجد في نفسه هذا الابتلاء البستاوي
ان يعي جيدا جدا و يفهم آخر حاجة
ان الرياح تأتي بما لا تشتهي السفن
و ان الدنيا غدارة
ان اجري يا ابن آدم جري الوحوش .. ان كبر ابنك خويه
و ان رب قوم اولانيين راحو لقوم تانيين .. و مالقهمش .. خدو بعضهم و رجعوا تاني
و انا على فكرة مش بهرج
الكلام ده بيحصل بجد
في كل يوم و مع كل الناس
أمال افكر ازاي .. يسأل البستاوي
أجيب بعد النجمة القادمة
المهم يا عم البستاوي
فكك من اللي في دماغك
الحياة الكاملة في الجنة
الدنيا اللي كل حاجة فيها مستقيمة
حاجة تحلم بها في نومة سيادتك
انما الدنيا
أمر آخر و قضية أخري
و الدليل الشنيع المريع الحديث النبوي التالي
"كل ابن آدم خطاء"
"و خير الخطاءون التوابون"
او كما قال صلي الله عليه و سلم
أقصد من هذا الحديث
ان البني آدم نفسه ليس مستقيم
و يا ريت كده وبس
ده خطاء
و انت عارف طبعا ان خطاء صيغة مبالغة
يعني اول ما اصحي خطأ
في الصبح خطأ
في العصاري خطأ
قرب المغربية خطأ
في اول الليل خطأ
في آخره خطأ
قبل النوم خطأ
و مش بعيد في حلم النوم خطأ
طبعا خطأ عن خطأ يفرق
و مع ذلك الخيرية لا تفارق اي منهم
الخيرية غير مرتبطة بكم الخطأ و يمكن حجمه
انما الخيرية لمن تاب عن خطأه باستمرار
و يا سلام لو عمل شفت ديليت لحبة الاخطاء الكبيرة
و شوية الاخطاء الصغيرة مقدور عليها
*
عزيزي البستاوي
سألتني افكر ازاي
اقولك يا مان
مبدئيا انت شخص عظيم
كالفرسان بالظبط
بس فرسان من نوع ميل جبسون و بريف هارت
او فرسان مسلسل بيبرس و قطز
انما الالفية دي حضرتك لا فيها حصنة ولا سيوف حضرتك
اتفضل بعد اذنك انزل من السحابة البيضا التخينة اللي انت مربع فوقيها
و اتمشي على الاسفلت كده وخدلك كام مطب من وفرة النقر بالشوارع
انا مش بقولك غير تفكيرك
العفو يا اكسلانس
انما حطه في اطاره المظبوط
فعله في حجمه الطبيعي
مش حجمه الخيالي
الخيال سعادتك لا بيودي ولا بيجيب
الواقع حضرتك بيودي و يجيب و يغسل و يكوي
لذا أدعوك ان تستخدم موجتك على الواقع
هنا تبقي راجل كفاءة
انت حتة موجة مندفعة
بشوية تخطيط بسيط و تفكير هين
و التزام من اللي هو متعب ده
أبشرك بأنك حتبقي زويل برادعي كده يعني
بجد والله .. حاشتغلك ليه
انما الرك على اللي يمسك نفسه مش نفسه تمسكه
فاهمني طبعا
انت بني آدم طماع
اتفهم طمعك
لذا انصحك انك تدعي كتير
محدش حيعملك اللي انت عايزه غير ربك
صدقني و الله
و ادرس كويس موجتك تصلح لايه و ما تصلحش لايه
الله يكرمك
و بصر نفسك بعيوبك علشان توجه نفسك لو لزم الامر
و توجيه نفسك بنفسك مش عيب .. بتحصل في احسن العائلات
*
بالنوسبة بقة للصورة أعلاه
فهي من فيلم هايل .. اسمه
Men of Honor
حكاية واحد اسود امريكي
كان عايز يخش الجيش البحري في زمن كان السود خدامين و بس
و لما ربنا كرمه و عتب الجيش ربنا رزقه بقائد وسخ اخلاقه زبالة و مضطهد السود
طبعا عيش في المعاناة طول الفيلم
بس في آخره اتفرج علي الشاب الاسود لما رجليه اتكسرت
و حب يرجع تاني الجيش
الدنيا اتقلبت ضده و غيروا القوانين و حطوا شوية اختبارات زيادة مايقدرش عليها
و مع ذلك صاحبنا الاسود لم يتراجع ألبتة
و لما كان محتاج لحد يدربه .. و شوف الدراما الأمريكاني .. القائد الوسخ هو اللي دربه و آمن بيه فشخ
و بالفعل في نهاية الفيلم يتوج البطل الاسود عائدا للجيش الامريكي البحري
في نموذج درامي فني عالي خطير يصور الفتي ذو الموجة و كيف احسن الاختيار و سار في اختياره للنهاية
اتعلموها بقه
الحكمة ضالة المؤمن .. أينما وجدها هو أحق بها
و في هذا الفيلم حكم و حكم
و حكم
*
يا رب
نسألك
حرث الدنيا
و حرث الآخرة
